رسالة شكر :)

السلام عليكم ورحمة الله :)

بقالى كتير مكتبتش حاجة .... وبقالى كتير محاولتش أعبر عن اللى جوايا بالكتابة
وانهاردة أول مرة من فترة كبيرة أعيش يوم كامل أعصابى مرتاحة فيه وهادية نفسيا من أوله لآخره (أو لحد دلوقتى عالأقل) :))
وده بيخلينى عاوزة أقعد بروقان كدة وأتكلم مع أصحابى شوية
أصحابى اللى أنا حاسة إنى تعبتهم معايا الفترة اللى فاتت بسبب ظروفى
أصحابى بجد اللى استحملونى من غير ما يملوا او يبعدوا عنى ونا فى أسوأ حالاتى
أصحابى اللى منهم اللى فهم اللى انا فيه وريحنى حتى لو مش مقتنع
ومنهم اللى فهم ومعرفش يريحنى
ومنهم اللى لافهم ولاعرف يريحنى بس اهو كان بيحاول وبيهتم وبيسأل ويدعيلى وخلاص :)
وكلهم كلهم بجد مش هعرف اكفيهم حقهم من الشكر ولا اوصلهم قد ايه
وجودهم جنبى فرق معايا حتى لما مكنتش حاسة بكدة بس عرفت بعد كدة انه بجد فرق معايا

بجد يا أحسن ناس مش عارفة أشكركم ازاى
وبجد بتمنى محدش يعيش اللى انا عشته ولا يجربه
وبتمنى ربنا يقدرنى أردلكم الجميل واكون ليكم زى ماكنتم ليا
وبتمنى من ربنا يجمعنى وإياكم دايما على حبه وطاعته وعالخير والبر وينفعنا ببعض وينفع الناس بينا
ويجمعنا جميعا فى جنته مع من نحب ومن يحب ويرضى

الرسالة دى جت فى أول يوم فى السنة الجديدة
ونا من زمان بطلت اتمنى حاجة فى أى سنة جديدة
والسنة دى مش هتمنى غير حاجة واحدة بس
ربنا يجمعنى بكل اللى بحبهم دايما عالخير وميدوقناش ألم الفراق ومرارته ويصبرنا ويهدينا لنوره وحبه ورضاه

قولوا آمييييييييين :)

السلام عليكم ورحمة الله وبركاته

يوم فى التاريخ.....يوم فى زاكرة الأمة.....انهاردة أول يوم فى تسجيل خواطر جيلنا .....أحلى وأروش وأجمل وأعقل ,انيل جيييييييل فى كل العصور....جيل التمانينات....جيل المظاليم والمنحوسين.....جيل الهاربين والمهاجرين ....جيل الشبابا اللى عاوز يبنى ومش عارف....وعاوز يتجوز ومش عارف.....وعاوز حتى يتكلم وبرضه مش عارف

جيل لسة عنده أمل إن بكرة لينا....وأكيد وبإذن الله هنرسمه ونحدد ملامحه بإيدينا
جيل بيحلم ببلده أم الدنيا تكون فوق الدنيا ....بيحلم يشوفها منورة وزاهية وبأولادها فرحانة ومتباهية
جيل عاوز يعمل كتيييييييييييييييييييير......وبرضه محتاج ياخد كتييييييييييييييييير

بقالى كتير ونا بحس كل اللى حواليا محبط وبيشدنى معاه لإحباطه.....بحاول أمسك خيط أمل أشد بيه نفسى من وسطهم....مش عاوزة أرجع تانى لليأس والإحباط لإنهم كانوا فى مرحلة سودا من حياتى .....عيشتهم بأرفهم وكآبتهم وأفكارهم السودا......وبكره أفكر مجرد تفكير إنى أرجع أحس الإحساس ده تانى.....مجرد التفكير فى احتمال حاجة زى كدة ممكن يقتلنى بجد

مش عاوزة أكتئب ومش عاوزة حد حواليا يكتئب......بحلم بيوم كل الناس فيه متفائلة وراضية - مش ساكتة ومستسلمة - لأ....راضية بس ليها وقفة مع كل حاجة حواليها وعاوزة تغير حتى لو مش عارفين نغير.....بس عالأقل نثبت لنفسنا ولكل العالم إننا عاوزين نتغير

نبدأ بحاجة....بأى حاجة...مهما كانت صغيرة أو تافهة من وجهة نظر البعض.....اكيد هيكون ليها تأثير عند البعض الآخر

هنبدأ إزاى ومنين؟؟ هو ده السؤال

أنا هبدأ بإنى أحكى مواقف عدت عليا فى حياتى سواء حصلت معايا او مع ناس حواليا......يمكن هتكون من رأى ناس كتير حاجة هايفة وملهاش اهمية
بس أنا هعتبرها تبادل أفكار وخواطر مع جيلى كله ...لإنى أكيد هفيد حد بكلمة من كلامى ....وأكيد برضه هستنى تعليقاتكو اللى اكيد هتفيدنا كلنا بشكل أو بآخر